Það eru oftast sömu haustverkin sem bíða manns þegar sumri fer að halla.  Reyndar var þetta haustið mun annasamara hjá mér þar sem ný vinna tók við í ágúst og mesti annatíminn í skólunum þegar þeir byrja.  Tölvukerfi skólanna á Suðurlandi eru nú öll komin í ágætis form og hlutirnir komnir í fastar skorður.  Núna er nýlokið haustþingi Kennarafélags Suðurlands.  Þar eru meðal annars ýmsir fyrirlestrar og málstofur og tók ég þar þátt í að stjórna einni þeirra á  vegum 3F.  Þeir kennarar sem þar mættu voru áhugasamir um félagið okkar og einnig um það sem við höfum uppá að bjóða t.d. námskeið, ráðstefnur og kynningar.  Nú er það verk framundan að kynna félagið ennþá meir og krækja í sem flesta félaga.  Endilega skoðið heimasíðu 3F hér og kynnið ykkur það sem þar er í boði.

Eftir yfirreið mína um skóla Suðurlands hef ég það á tilfinningunni að upplýsingatækni sé komin ágætlega á skrið í sunnlenskum skólum.  Á flestum stöðum er vakning og áhugi yfirmanna fyrir hendi og stutt er við bakið á upplýsingatækninni.  En ennþá vantar uppá að kennarar nýti sér þá tækni sem fyrir er og að þetta verði sjálfsagður hluti af kennslunni.  Þó er það nú þannig að ef t.d. netsamband dettur út þá virðist vinna leggjast niður einhverra hluta vegna og sýnir það kannski hversu mikið upplýsingatæknin er notuð þó manni finnist það ekki.

Ég er búin að einsetja mér það að kanna ýmsa hluti í sambandi við netsamfélög og annað núna í sumar.  Þetta er heill frumskógur og það er mikil vinna að finna hinu ýmsu hluti sem maður getur notfært sér til að hafa uppi á vinum og vandamönnum og vera í sambandi við þá.

T.d. er það IGoogle sem er náttúrulega bara snilld en þar getur maður sett saman sína eigin upphafssíðu og haft þar t.d. Gmail aðganginn sinn, Twitter (einskonar örblogg) og skoðað fréttirnar allt á sömu síðunni.

Jú og síðan er það Twitter sem er örblogg til að láta vini sína vita hvað maður er að gera á þessari stundu eða hvað manni er efst í huga.  Facebook er heilt samfélag útaf fyrir sig sem ég er ennþá að reyna að kanna og er þegar búin að finna nokkra löngu horfna vini og endurnýja kynnin.

Svona mætti halda áfram endalaust og þegar maður er að skoða alla þessa möguleika hugsar maður stundum hvort þetta sé allt nauðsynlegt?????

Ráðstefna 3f um fjarkennslu verður haldin í Háskólanum í Reykjavík 17. október næstkomandi nánar hér.

Mér tókst það!! Hér á blogginu mínu hef ég verið að velta vöngum yfir starfi ráðunautar í Upplýsingatækni á Suðurlandi.  Nú er svo komið að ég er búin að skipta um vinnu og er á leið í starf þar sem ég get breitt út fagnaðarerindið til fleiri skóla.  Veit ég vel að nú þarf ég að passa mig á að fylgjast með innan skólageirans og sofna ekki á verðinum.  Þróun í upplýsingatækni er rosalega ör og maður þarf að hafa sig allan við að fylgjast með.  Ég vona að ég eigi eftir að eflast í starfi og miðla af reynslu og þeirri þekkingu sem ég hef náð mér í.  Í ágúst hef ég störf hjá TRS eða Tölvu og rafeindaþjónustu Suðurlands á Selfossi og mun aðallega vera tengiliður fyrirtækisins inní skólana á Suðurlandi í sambandi við tæknimál.

Það er búið að standa lengi í Aðalnámsskrá grunnskóla að upplýsingatækni eigi að kenna í gegnum aðrar námsgreinar.  Þegar maður hugsar um það og fer að reyna það á eigin skinni þá er þetta náttúrulega alveg augljóst.  Við hér í Flúðaskóla erum búin að þróa með okkur nokkra samvinnu á sviði upplýsingatækni, raungreina og íslensku þar sem þessar þrjár greinar fléttast saman í eitt stórt verkefni.  Núna um þessar mundir eru nemendur í 9. bekk að vinna stóra ritgerð í raungreinum sem einnig gildir sem einkun í íslensku og upplýsingatækni.  Nemendurnir fá tímana í upplýsingatækni til að vinna ritgerðina og þar með hjálp við uppsetningu hennar og vinnslu.  Einnig er tekið fyrir í íslensku heimildaskráning og annað því tengt.  Þessi samfinna fer svo öll fram í Moodle þar sem nemendur hafa aðgang að gögnum og geta unnið í ritgerðinni heima og í skóla.  Þessi samvinna er mjög góð fyrir okkur öll og nemendurnir eru ánægðir með að geta notað Moodle vefinn til að hafa öll aðföng á.