Næsta haust verður gerð tilraun með að nota Open Office í Flúðaskóla, verður skrifstofuvöndullinn notaður samhliða Office 2007 til að byrja með.  Eftir fall krónunnar í haust og með hækkandi verði frá Microsoft hefur Microsoft samningurinn hækkað umtalsvert og eru nú skólastjórnendur í óða önn að finna leiðir til að lækka rekstrarkostnað.  Það verður því gaman að geta leyft ykkur að fylgjast með þróuninni í Flúðaskóla.

Það eru oftast sömu haustverkin sem bíða manns þegar sumri fer að halla.  Reyndar var þetta haustið mun annasamara hjá mér þar sem ný vinna tók við í ágúst og mesti annatíminn í skólunum þegar þeir byrja.  Tölvukerfi skólanna á Suðurlandi eru nú öll komin í ágætis form og hlutirnir komnir í fastar skorður.  Núna er nýlokið haustþingi Kennarafélags Suðurlands.  Þar eru meðal annars ýmsir fyrirlestrar og málstofur og tók ég þar þátt í að stjórna einni þeirra á  vegum 3F.  Þeir kennarar sem þar mættu voru áhugasamir um félagið okkar og einnig um það sem við höfum uppá að bjóða t.d. námskeið, ráðstefnur og kynningar.  Nú er það verk framundan að kynna félagið ennþá meir og krækja í sem flesta félaga.  Endilega skoðið heimasíðu 3F hér og kynnið ykkur það sem þar er í boði.

Eftir yfirreið mína um skóla Suðurlands hef ég það á tilfinningunni að upplýsingatækni sé komin ágætlega á skrið í sunnlenskum skólum.  Á flestum stöðum er vakning og áhugi yfirmanna fyrir hendi og stutt er við bakið á upplýsingatækninni.  En ennþá vantar uppá að kennarar nýti sér þá tækni sem fyrir er og að þetta verði sjálfsagður hluti af kennslunni.  Þó er það nú þannig að ef t.d. netsamband dettur út þá virðist vinna leggjast niður einhverra hluta vegna og sýnir það kannski hversu mikið upplýsingatæknin er notuð þó manni finnist það ekki.

Það er búið að standa lengi í Aðalnámsskrá grunnskóla að upplýsingatækni eigi að kenna í gegnum aðrar námsgreinar.  Þegar maður hugsar um það og fer að reyna það á eigin skinni þá er þetta náttúrulega alveg augljóst.  Við hér í Flúðaskóla erum búin að þróa með okkur nokkra samvinnu á sviði upplýsingatækni, raungreina og íslensku þar sem þessar þrjár greinar fléttast saman í eitt stórt verkefni.  Núna um þessar mundir eru nemendur í 9. bekk að vinna stóra ritgerð í raungreinum sem einnig gildir sem einkun í íslensku og upplýsingatækni.  Nemendurnir fá tímana í upplýsingatækni til að vinna ritgerðina og þar með hjálp við uppsetningu hennar og vinnslu.  Einnig er tekið fyrir í íslensku heimildaskráning og annað því tengt.  Þessi samfinna fer svo öll fram í Moodle þar sem nemendur hafa aðgang að gögnum og geta unnið í ritgerðinni heima og í skóla.  Þessi samvinna er mjög góð fyrir okkur öll og nemendurnir eru ánægðir með að geta notað Moodle vefinn til að hafa öll aðföng á.

Ég er búin að gera tilraun með forritið Scratch í vali hjá mér með nemendum í 8. til 10. bekk.  Þau voru mjög fljót að tileinka sér hugsunina í sambandi við forritun enda er forritið einfalt í notkun og myndrænt.  Það leið ekki langur tími þar til persónur tölvuleikjanna voru farnar að hreyfast og skorið að telja.  Útkoman var misjöfn eins og nemendurnir voru margir en í öllum tilfellum mun betri en ég þorði að vona í upphafi valsins.  Forritið Scratch hefur sem sagt staðist prófið og er núna komið í hóp þeirra forrita og lausna sem boðið verður uppá í vali í Flúðaskóla hér eftir.

Jæja ég er nú ekki búin að vera sérlega dugleg við að skrifa, kannski meira búin að hugsa og veltast með spurningar í hausnum síðan ráðstefna 3F var haldin 3. nóv. síðastliðinn.

Þar hlýddi ég á fyrirlestur Kolbrúnar Hjaltardóttur um nýja rannsókn sína á inngrip í tölvunotkun í grunnskóla, helsta niðurstaða þessarar rannsóknar var að það vantaði stuðningsnetið fyrir grunnskólakennara í upplýsingatækni.  Ég er uppalin í sveit og er bóndi í hjáverkum með kýr og kindur og allan pakkann.  Stuðningskerfi við bændur hefur lengi verið til staðar með tilheyrandi ráðunautum og möppudýrum alltaf eru uppi gagnrýnisraddir um tilurð þessara ráðunauta en ég held að það séu samt allir sammála um að það er gott að geta leitað til þessara ráðunauta og að því leiti eru þeir ekki óþarfir.

Það sem ég er að fara er að í bændastéttinni er gott stuðningsnet þar sem hægt er að leita til fagaðila ef þörf er á.  Í kennarastéttinni eru vissulega allir fagaðilar á sínu sviði en það gildir svolítið annað um upplýsingatæknina þar eru ekki eins margir klárir á svellinu eins og í almennri kennslu.  Þess vegna skapast óöryggi sem kennarar vilja forðast og af því leiðir að þeir forðast það að kenna upplýsingatækni, eða nota hana sem skildi.

Ég sá fyrir mér þegar Kolbrún var að kynna niðurstöður rannsóknar sinnar að þetta væri starf sem ég gæti hugsað mér að sinna.  En hvert á ég að leita? Hver á að sinna þessari ráðgjafaþjónustu?  Hvar á ég að byrja?? Er þetta í höndum Skólaskrifstofu?? Eða einkaaðila??

Þetta eru spurningarnar sem ég er búin að vera að veltast með í hausnum síðasta mánuðinn.  Getur þú lesandi góður bent mér á hvert ég á að leita, eða er þetta alveg út í hött?

Hér að neðan læt ég fljóta með glærurnar hennar Kolbrúnar frá ráðstefnunni Vörður vísar veginn sem 3F hélt

| View | Upload your own